绝处逢生士气爆灯 热血丹麦齐心攞威

　　欧国盃16强大战，喺分组赛绝处逢生嘅丹麦，于阿姆斯特丹中立场火併威尔斯。威尔斯分组赛表现平稳，但气势明显唔及士气高昂嘅丹麦，呢支北欧劲旅克服重重难关，一众球员亦逐渐寻回最佳状态，有力击退威尔斯延续「童话之旅」。

　　1992年欧国盃童话式夺冠嘅丹麦，今届经历噩梦开局，基斯甸艾历臣喺首战因心脏问题晕倒球场，丹麦痛失主力，球员精神上受严重打击，结果头两场输晒。不过佢哋喺冇退路下踢出最热血一仗，4比1大破俄罗斯后奇迹以次名出线，球员士气及信心自然处于高点。事实上丹麦合作同战术亦相当成熟，佢哋3场分组赛录得59次攻门，平均每场有接近20次，经历上仗大炒俄罗斯后，尤素夫保臣及丹斯加特等前锋已经「挞着」，加上贺积查治喺中场一夫当关，相信表现会愈来愈好。

　　威尔斯输往绩

　　威尔斯分组赛以1胜1和1负成绩，凭得失球差压倒瑞士以次名出线，不过3场赛事仅入3球，表现冇太大惊喜，仍然係依赖加里夫巴利同艾朗蓝斯两大球星支撑。威尔斯上仗输畀意大利，中场艾芬安柏度食红牌今场要停赛，战力受到削弱。佢哋过去4次同丹麦交手1胜3负，唯一赢波只係热身赛，其馀3场败仗都係喺正式国际赛，丹麦可睇高一线。