英超攻略：打救纽奴热刺大反击

力求反弹嘅热刺，今晚英超主场迎战阿士东维拉。热刺联赛3连败，极需要一场胜仗冲喜，射手哈利卡尼上周中欧协联连中三元，状态甚勇；阿士东维拉亦有丹尼艾格斯呢位射得之人在阵，今场斗攻肯定多波入，2.5球入球大必捧。

热刺联赛连输3场「伦敦打吡」，先后不敌水晶宫、车路士同阿仙奴，当中输畀「兵工厂」最伤，领队纽奴（圆图）依家已经闻到鱿鱼香，今场再赢唔到的话，恐怕唔会留得喺球队几耐。

好彩上周中欧协联主场，热刺以5比1大炒斯洛文尼亚球队梅拿，算系畀纽奴一个喘息机会，更重要系状态低沉嘅哈利卡尼大演帽子戏法，如果「哈神」可以Keep住道气，今场有望喺英超开斋。而且热刺阵中仲有「拚命三郎」孙兴民，呢位南韩前锋联赛已经攻入3球，同样系热刺嘅进攻泉源。

对维拉惯演入球骚

阿士东维拉虽然放走球星基亚利殊，但买入丹尼艾格斯，亦非常配合球队踢法。呢名前修咸顿射手至今为维拉喺联赛上阵6场，已经贡献2个入球及2次助攻，面对近6场都有失波嘅热刺防线，丹尼艾格斯唔难搵到入波机会。翻查纪录，双方近4次交手，有3次开总入球3球或以上，中位数2.5球入球大好路。