基达菲切尔达闷战吼半和

　　今晚西甲独脚戏有下游对决，基达菲主场迎战切尔达。基达菲易帅后未见有太大起色，切尔达喺老将伊亚高艾斯巴斯缺态下，实时哑火，作客出击初段唔敢冒进，半场和更值博。

　　上季护级成功嘅基达菲，今季依然低迷，开咧头9轮只得2和7负，沦落到包尾，搞到主帅兼前皇马中场米高亦要落镬，改由科里斯回巢接手；不过呢位教过华伦西亚、屈福特嘅教头，上任后首仗亦只能同利云特互交白卷。基达菲最大问题，系攻力极度疲弱，开咧后9轮入得3粒咁大把，其中6场食白果，成班球员唔多识入波，睇嚟都系有排执。

　　伊亚高艾斯巴斯状态下滑

　　切尔达一向靠伊亚高艾斯巴斯单天保至尊，但呢位队长年纪唔细，状态下滑亦在所难免，佢哋开咧后9仗赢得2场，仅入7粒，其中两球更系靠艾斯巴斯取得，可见切尔达仍然好倚赖佢数胡，当艾斯巴斯跌Watt，球队进攻即陷于瘫痪，近两仗输晒绝对有办你睇，预计今次客场出击会先求稳阵。

　　查实切尔达初段踢得极保守，近4仗上半场全部打和，半场波胆全开0比0，明显佢哋上半场唔敢乱攻，遇上攻力极曳嘅基达菲，随时系闷斗闷格局，半场和不妨再追。